الفصل السابع والثلاثون
وقف جلال ادام الباب ، متردد ! يخبط ولا ميخبطش ؟ يلف ويرجع تاني ولا يتقدم ويكتشف الحقيقة بنفسه
_ حقيقة ايه يا جلال ، ايه اللي جابك
سؤال جواه اتردد ومش عارف اجابته ، غمض عيونه وهو في منطقتها ، بيفتكر اليوم اللي راح رجعها فيه وباسها ! كانت احلى لحظة عاشها من شهور !
وقف ادام باب بيتها الجديد والتوتر والخوف مسيطرين عليه وقرر يتراجع ويمشي ولكنه فجأة افتكر كلامه مع امه
_ انا مكونتش عاوزة اقولك بس انت لازم تعرف
سكت جلال يسمع كلام امه اللي خلاه خايف لأن شكلها مكانش يطمن وكانت متوترة واستجمعت نفسها وقالت
_ بص يا جلال ، مازن راح لمراتك اكتر من مرة بيتها لما كانت غضبانة !
جلال وشه استغرب كأنه مش فاهم الكلام ولكنه فجأه وشه اتحول للأحمر وفهم قصدها من نظراتها وذاد الطين بلة لما كملت وقالت
-ونعمات شافتهم كذا مرة مع بعض برا البيت وشافت رضا في عربيته !
بصلها وملامحه كلها اتبدلت للحزن الشديد ، جسمه كله اتوتر وحاول يبلع ريقه عشان يقدر يتكلم ويسألأ بتشكيك
_مقولتليش ليه قبل كدة !
_ انت جيت وكنت زعلان ومتضايق مني ، ولقيتك بتقولي انك عاوز تعيش معاها علطول وحاسس معاها بالأمان ،
قلبي مطاوعنيش اجرحك واقولك الحجات دي ، بس بعد الكلام الاخير اللي انت قولته كان لازم اقولك عشان تقرر انت هتعمل ايه وهتتصرف ازاي
نبرتها مانت مؤثرة وحزينة وكلها شفقة خلت جلال يتأثر بيها والاشك يدخل قلبه وذكريات رضا مع مازن تظهر ادام عيونه ! وبيسألأ نفسه ازاي قدرت تتحمل بعده في نفس الوقت اللي كانت بتقول فيه انها عمرها ما تقدر تبعد عنه ، اكيدكان فيه سبب غير الخيانة ، معقول مازن يكون هو السبب ! معقول مازن خطفها منه !
انتفض جلال ورفض رفض تام لتفكيره ولكلام امه وهتف فيها بعيونه الحمرة وصوته المبحوح من الصدمة
_ انتي كدابة ، ونعمات كمان كدابة ، كلكوا كدابين
_ بتتهم امك بالكدب يا جلال !
قالتها انجي بزعل وبصدمة فرد عليها جلال بتأكيد
_ ايوة ، عشان انتي عوزاني ابعد عنها وعوزاني اكرهها
عداء جلال لأمه كان واضح وظاهر خلاها تبصله ببغض وتقوم من جنبه وهي بتقوله اخر كلماتها
_ براحتك ، انا قولتلك عشان متعلقش نفسك اكتر من كدة ومتتجرحش في الاخر
بصلها بعيون كلها تحدي وؤفض وتمرد على اللي هي بتقوله لكنها مع ذلك قالت
_ ولو عاوز تتأكد انت تقدر تتأكد بس ياريت متعرفش رضا عشان حملها صعب واي توتر خطر عليها
واجته ضهرها عشان تمشي وسمعت صوته بيقول بخشونه امتجزت مع الحرقة الظاهرة جدا
_ مش هتأكد ، مكونتش متخيل ان كرهك ليها يوصل للدرجادي
ابتسمت بسخرية مريرة وقالت بحزن
_ الله يسامحك يا جلال !
ومن بعد كلامها جلال مكانش عارف ينام ولا كان عارف يمنع نفسه من التفكير ودحل اوضته لقى رضا نايمة فضل يبصلها كتير وهو متحير وخايف ومرعوب وبيسألأ ىنفسه لو كلالم امه كلع صح ! هيعمل ايه !
مقدرش يعيش في التوتر دا ليلة كمان واول ما طلع النهار وقبل حتى ما يفطر ولا يعمل اي حاجة لبس هدومه وراح عند بيت رضا الجديد يستفسر ويعرف كل حاجة بطريقته وهو حاطط ايده على قلبه من ان الكلام يطلع صح وبيتمنى انه يطلع غلط
فاق جلال من افكاره وجليلة مراة أبو رضا واقفة ادامه بوش متوتر وخايف لان دايما مواقفها مع جلال بتزعلها وجلال علطول بيأدبها على اغلاطها
_ اتفضل يا جلال بيه
قالتها بترحيب كبير وتوتر فدخل جلال من غير ما يرد عليها وقعد على احد الكنبات اللي كانوا موجودين في غرفة الضيوف وقال فورا ودخل في الموضوع علطول
_ هو سؤال واحد ولو كدبتي انا هوريكي عذاب مشوفتيهوش في حياتك
اسلوبه كان مخيف خلاها تجاوبه بسرعة
_ من غير ما تقول اسال وانا اجاوب علطول
خد جلال نفس وهو مش قادر يتخيل انه هيسألأ دلوقتي على مازن !
_ مازن صاحبي جه هنا !
قدر يسأل اخيرا وتنهد بعد السؤال و
أهل قلبه انه يسمع اجابة تكسره ، كان ايده على قلبه وهو بيسأل لحد ما جاله رد جليلة
- مازن مين يا بيه
_بتكدبي من الاول
كان رده عنيف لما سمع ردها وهي بتتظاهربعدم المعرفة رغم انه حس بسعادة انها مش عارفة مازن اصلا لكنه حس انها مش بتقول الحقيقة
_ ، لا والله مش مركزة مين مازن ده
احنا مدخلش بيتنا حد اسمه مازن خالص
كانت مرعوبة وهي بتجاوب وجلال حس بالصدق من كلامها وحس ان قلبه ارتاح لكن فجأه
دخلت واحدة من اخوات رضا وقالت
_ مازن ياما اللي كان بييجي يشوف رضا
_ جلال اتصدم بعد ما كان خلاص صدق ان الست متعرفش مازن فعلا
_ خشي جوا يا مقصوفة الرقبة
زعقت فيها أمها اللي اترعبت وخافت من ردة فعله وجلال بصلها بعيون غامقة وكلها غضب وطلب منها تحكيله كل حاجة
_ لو مقولتيش كل حاجة حصلت انا هجيب الغفر يحبسوكي في مكان محدش هيعرف يوصلك فيه !
بلعت ريقها وقالت برعب وبسرعة
لا لا هقول كل حاجة من الاول والله_
واتنفست وبدأت تحكيله كل حاجة ، حكتله اللي خلاه يبصلها وعيونه فيها دموع رافضة انها تنزل عشان واحدة زيها !
_ كان في واحد اسمه مازن جالنا كذا مرة بس كانت بتقول انه صاحبك وان هي بتروح تشوفك
_ بتروح تشوفني ازاي
سأل جلال باستغراب وصوته تقيل من الحزن والصدمة من اللي بيسمعه
_اصلها كانت بتخرج معاه علطول
الجملة اللي قالتها خلت جلال يفتح عيونه على اخرهم وهو هيموت من الصدمة !
وجليلة بتكمل
_ كان بييجي يقعد مكانك كدة بالظبط
جملتها قهرته وبصلها جلال بعيون قاسية وقلب بينتفض فخافت من نظرته وقالت
_ ولما اسالها راحة فين تقولي راحة اقابل جلال وصاحبه جاي ياخدني ليه
بص جلال في الارض وقدرش يرفع راسه وعيونه كلها غيامة من الدموع وحمرا من الغضب اللي بيذداد جواه كل ما جليلة تقول كلمة ذيادة ، وفجأه سمع اللي خلى نفسه يعجز عن أخذه
_بس اخر فترة كانت بتتعب وترجع وتهبط فمكانتش بتخرج معاه ، لحد اليوم اللي انت جيت فيه
_ بترجع !!!!!!!!!!!!
هتف بها جلال بحريقة وصدمة بعد مبقاش قادر يسيطر على اعصابه ! الكلام اللي هي بتقوله خطير جدا وبدأ عقله ياخده في سكة تانية خالص
_ اه والله دا انا فكرتها حامل حتى
قالت جليلة بنبرة بريئة ، سكت جلال وعجز عن الكلام وجليلة قالت بلهفة
_ هي حامل يا جلال بيه بالله عليك طمنا وفرحنا ، انا طلبت منها تروح للدكتورة بس مكانتش عاوزة ، هي حامل صح دي اعراض حمل انا متوهش عنها ابدا ، قولنا وفرحنا
الكلام خلى الشك يقتل جلال والست كانت بتقوله ببراءة كبيرة جدا خلت جلال يحس انه مغفل ورضا بتلعب بيه الكورة !
خرج جلال من غير ولا كلمة وهوو ماشي ببطئ وكان حاسس انه هيقع من طوله في اي لحظة !
أما جليلة وقفت تتفرج عليه وهو مش قادر يمشي من الصدمة وهي على وشها ابتسامة عريضة شيطانية
وقدرت جليلة تنفذ خطتها على جلال فعلا
وركب هو عربيته ومشي وعقله وقف عند اللحظة اللي سمعه فيها اخطر كلام في عمره كله
_ ازيك يا جلال ..
وقف جلال يبصله بعيون غامضة ومردش ، بدأ يتأمله وعيونه ثابته عليه بقوة ، استغرب مازن لكنه دخل عليه وقاله
_ اقعد ، ليه واقف
استغرب مازن إللي لقى الشغالة بتقوله إن صاحبه مستنيه برة فخرج وراح يشوفه وشكله كان غريب ومريحوش ورغم انهم آخر مرة كانوا متخانقين وجلال ضربه إلا إن مازن كان ذوق في التعامل ورحب بيه
لكن مفيش رد من جلال غير ان نظراته مترفعتش من فوق مازن ، كرمش مازن جبينه ومتحملش اللي جلال بيعمله وكأنه كان حاسس جلال جاي ليه بالظبط
_ في ايه يا جلال بتبصلي كدة ليه ؟
بردو مفيش رد ولكن نظرات جلال ذادت حدة مع احتقار فاتنرفز مازن وهتف
_ طالما مفيش حاجة ليه جيت بيتي ؟
نظرات جلال الباردة وصمته خلت مازن يتعصب أكتر وقرب منه وهدده بعنف
_ انت تعرف اني ممكن اطردك دلوقتي زي ما عملت فيا اخر مرة
جلال متهزش وفضل واقف أدامه يسأل
_ ليه بتمثل إنك بتحبني وانت بتكرهني يا مازن
مازن اصابته حالة ذهول من سؤال جلال وشاور على نفسه باستنكار وهو بيقول
_ انا بكرهك ! أنا مازن مش رامز
جلال وشه رغم برودة ملامحه إلا ان صوته الهادي بذيادة خلى مازن يستشعر حزن غريب فيه ، ولكن مازن اتعصب وهو بيسمع جلال بيقول بجمود
_ رامز أحسن منك ، كان واضح في كل جاجة وكان ناقصه كتير بس أنت مش ناقصك أي حاجة عشان تعمل فيا كدة
مازن ممسكش اعصابه واندفع لجلال يسأله بتحفز وغضب
_ عملت فيك إيه يابني وبعدين أنت عندك إيه ذيادة عني أبصلك فيه من أصله ؟
سحب نفسه بعد رده الغاضب والمنفعل وقال
_ جاي تقول كلام غبي من بتاعك وأنا اللي فكرتك جاي تعتذر على إللي عملته آخر مرة
_ رضا حامل
كان رد جلال بجملة واحدة ومشاعر جامدة ومازن اتصدم
_!ايه؟
_ حامل في الشهر التالت !
قالها وعيونه منزلتش من فوق مازن وكانت كلها اتهام لكن مازن مخادش باله وانقهر لما عرف انها كدة
خلاص ارتبطت بجلال لأخر العمر ومفيش أي مفر !
_ وهي عاملة ايه دلوقتي ، دي لسة صغيرة على الحمل والخلفة ، انت مسكتش غير لما دمرتلها حياتها !
لكنه اتصدم وفقد القدرة على الكلام وجلال بيقاطعه بسؤال بارد مريب
_ الولد ابن مين فينا ؟
فضل مازن واقف يبصله بذهول مش قادر يتقبل الجملة اللي سمعها ، حاول يجمع كلامه ويرد لكنه معرفش يلاقي كلام غير انه اتهمه بالجنون
_ انت اتجننت على الاخر
قرب جلال منه خطوة ببطئ وملامحه باردة وجامدة وسأل تاني
_ الولد ابن مين ؟؟
اتعصب مازن وكان رايح يشرحله
_ جلال ا !!
لكنه اتصدم اكتر لما لقى جلال بيشده من قميصه وبيرفع الاسلاح على رقبته !
_ قولي أحسن
تهديد جلال البارد مذادش مازن غير رعب وحسسه ان جلال مش حاسس بأ] حاجة والشيطان سيطر عليه وممكن يعمل اي جريمة دلوقتي !
عيون مازن كانت بصة لتحت في رعب للمسدس اللي كان في ايد جلال واللي راسه مدفونة فس رقبته !!!
حاول يتكلم ويقول
_ نزل البتاع دا ، انت مش كدة
لكن رد جلال جاله قاسي وكله تهديد وترهيب
_ انا كدة ، انت عارفني غبي ومجنون ومبرتاحش غير لما باخد إللي أنا عاوزه
خاف مازن اكتر وجلال حط ايده على الذناد وكرر سؤاله
_ الولد ابن مين !!
غمض مازن عينه والوضع إللي هو كان فيه كان مرعب لأي حد ، لكنه تماسك واستجمع قوته وبص في عين جلال وقال
_ طب لو بتكرهني ومش طايقني ، إزاي قبلت تقول كدة على مراتك ؟ متخليش تربيتك في أمريكا تنسيك إن مراتك شرفك ، نزل السلاح إللي أنت رافعه على صاحبك يا جلال !
عيونهم كانت في عيون بعض ، عيون جلال كلها قوة وإصرار اختلط ببرود مؤلم للي يبصله ، ومازن بيتمنى إن جلال الكلام يأثر فيه وينزل المسدس ! ..
بعد لحظات نزل جلال السلاح .. وهتف بنفس النبرة الميتة لكنها امتزجت بالسخرية
_ بتدافع عنها أوي كدة ليه ؟
رد مازن إللي عرف ياخد نفسه بعد ما جلال بعد عنه وقال
_ عشان هي كويسة وتستحق إني أدافع عنها
_ إزاي عندك الجرءة تتكلم عنها أدامي !
قالها جلال بعدم تصديق من جرءة مازن لكن مازن رد وقال
_ مانت لسة كنت بتتهمها في شرفها دلوقتي
وقرب من جلال وهو بيقوله
_ ولا أنت مش زعلان عشان بدافع عنها ؟ زعلان عشان بحبها !
ساح برود جلال إللي هجم على مازن يضربه بقوة في وشه ويسأله بغضب شديد
_ أنت بتقول ايه !!!
لكن مازن اتعدل وقال بقوة وصراحة
_ آه يا جلال بحبها ! ..
فاصل واقف مصدوم من إللي بيسمعه، أول مرة يسمع اعتراف مازن! صاحب عمره بيعترف إنه بيحب مراته !,
مسح مازن فكه من الألم وقال وهو بيبتسم بسخرية
_ متتصدمش أوي كدة أنت مبتحبهاش ، لو كنت بتحبها كنت عاملتها أحسن من كدة ، بس أنت طول عمرك أناني وبتمشي ورا غرايزك
سأل جلال فورًا وقلبه بيدق .. بيدق بقوة كأنه فيه زلزال وهينهار في أي لحظة وخاف يكون كلام جليلة صح وسأل بشكل صريح
_ قابلتها؟
_ قابلتها.
رد عليه مازن بسرعة وبدون تردد ولا خوف فعاد جلال بأسئلته
_ شوفتها كام مرة ؟
_ مرة واحدة بس.
بلع جلال ريقه .. ومازن كان بيجاوب بصراحة
_ فين ؟
_ في بيتهم .
_قولتلها ايه ؟
_ قولتلها إنك خاين ومتستاهلش حبها ولا تضحيتها عشانك .
بصله جلال بعيون حمرا ظهر فيها الحزن بوضوح ومقدرش يغطيه ولا يداريه وبقى في موقف ضعف ومازن هو إللي استقوى وهو بيقربله وبيقوله في وشه بكل صراحة
_ قولتلها إنها لسة صغيرة والعمر ادامها وعرضت عليها أخلصها منك .
انتفض قلب جلال وسأل بترقب .. مش مهم رأي مازن فيه .. أهم حاجة ردها هي كانت إيه!! هي ممكن تكون عاوزة تسيبه .. سأل بخوف وترقب من الإجابة إللي ممكن تدمره
_ ردت قالت ايه ؟
غمض عينه بعد السؤال .. مكانش مستحمل يسمع إللي سمعه من جليلة تاني ! ... بصله مازن باستغراب... ورغم ضيقه من جلال إلا إنه صعب عليه وهو شايفه ادامه خايف ووشه أحمر وعليه ملامح الرعب والخوف كأنه مستني خبر هينقذ حياته