الفصل المائة وأربعة

أهلا بالقراء الأوفياء.. أسعدنا جدا جدا تفاعلكم ونشرنا الفصل في ميعاده زي ما وعدنا❤️❤️شدوا الحيل في التفاعل على الفصل دا كمان والفصل الجديد هيتنشر أول ما الفصل على الفيسبوك يوصل للتفاعل المطلوب ❤️

كلهم مشوا وفضلت رضا وراه ... مدّت إيدها بهدوء، لمسة خفيفة على ضهره، لمسة ما فيهاش ضغط، بس فيها رسالة واضحة وكأنها بتقوله أنا هنا، ومش همشي.... ما احتاجتش تسأله ليه عملت كدة رغم كل الأذى اللي اتعرضنا ليه ، ولا تقوله خليك قوي وان انجي متستاهلش حد يحبها ، كانت عارفة إن وجع جلال ممش مستحمل نصايح .. مش محتاج حد يراجعه أو ينتقده ... جلال كان عاوز إللي يقف ويفهمه ... إللي يطبطب عليه مش إللي يحاسبه .. ومحدش قدر يفهم دا.. واللي فهم مقدرش يعمل ! انما هي فهمت وعملت!! ... عملت انها وقفت في جنبن وفي ضهره وقررت انها هي كمان .. مش هتمشي وتسيبه لواحده وهتقف معاه تستقبل الناس اللي هتيجي تعزي ! ...

رضا كانت حاسة بالصراع الكبير إللي جواه ، بحبه اللي مش مفهوم، بذنب مختلط بحزن، وبتعب سنين وأمل شايله كبير مقدرش يقتله مهما اكتشف من حقائق ... كانت سامعة نداءه من غير صوت، ومستقبلاه من غير شروط.... وجودها جنبه كان اعتراف صامت إنهم عدّوا الأسوأ، وإن اللي اتكسر قبل كده ممكن يتصلح وممكن هي تستحمل عشانه اللي متقدرش تتحمله عشان غيره ... هتستحمل عدوه وهتقف معاه و مش بالكلام، لكن بالصبر والوفاء والفعل .. عشان جلال ..

_ مش عاوزك تعملي حاجة فوق طاقتك .. هي متستاهلش انك تعملي أي حاجة عشانها .

قال جلال عشان يقولها انها لو عاوزة تمشي .. فتمشي ..ولكنها قالت برفق

_ أنا واقفة عشانك ... وبعمل عشانك .. مش عشانها...

في اللحظة دي ، حلاوة ونقاء حبها الكبير ليه ... خلاه يحس انه الدنيا كلها بتواسيه ! ، كان محتاج حد يشيل الوجع معاه….. وهي موجودة!! ورضا عملت ده من غير ما تنطق ولا كلمة زيادة .... .

حص بالدفئ بوجودها والسند والدعم ... حس بحد فاهم عمق مشاعره فعلا وشايف كل حاجة جواه ..

انجي مرحمتش رضا .... وجلال أكتر واحد عارف دا ...

من غير ما يرد عليها ، شدّ كتفه اللي هي حاطة ايدها عليه شدة صغيرة، حركة بسيطة، بس كانت اعتراف... اعتراف إنه حاسس بيها، وإن وجودها فارق... رضا فهمت الحركة دي كويس، وابتسمت ابتسامة خفيفة، مش فرح، لكن طمأنينة.. كأنها بتقوله خليك زي ما أنت، ما تتكلمش، أنا فاهمة

بدأ العزاء وبدأ المعزيين يحضروا .. ورضا ومعاها نعمات بيستقبلوا الستات في البيت .. وجلال ورامز بيتسقبلوهم برا عند الرجالة وعلي رغم كرهه الشديد لإنجي .. إلا انه وقف كتف في كتف مع جلال ....

انتهى العزاء أخيرا وكل واحد فيهم ودع جلال ورجع بيته .. دخل لقاها لابسة أسود... حجابها ولبسها كله أسود..

وقف أدامها شوية يبصلها ويشوف البيت وهو هادي وفاضي .... كان بيتأمل كل جزء فيه .. وكأنه بيهرب من عينيها لكنها عينها كانت عليه

_ أنت كويس ؟

سألته رضا فهز رأسه بالإيجاب وقال

_ الحمد لله...

_ طيب تعالى يلا عشان تاكل ...

قالتله فرد جلال بوهن

_ ماليش نفس

_ لأ دا مش طلب دا أمر..

وسحبته من ايده على المطبخ وبدأت تحطله أكل أدامه وكمان تطلع الدوا  ...

_ مش هقدر أكل

قال جلال فهي قربت منه ومسكت المعلقة ومسكت دقنه وقالت

_ هأكلك أنا...

وبدأت هي تأكله وهو بيبصلها وساكت ...

_ شكرا..

قال جلال وهو بيمضغ اول لقمة هي اكلتهاله.... وهي فهمت هو بيشكرها ليه طبعاا ... سكتت وقالت

_ عشانك يا جلال ... عشانك بس ...

بصلها وحس بأمان وهو بيخرج حيرته من جواه ...

_ أنا معرفش أنا زعلان كدة ليه ... عمري ما اتخيلت ان ازعل عليها كدة... 

_ من حقك تزعل يا حبيبي .. دي أمك في النهاية .

عيونه كانت في عيونها وفضل كتير يتأمل فيهم لحد ما قربت منه وبدأت تديله الدوا بدون ماهو يبشل مجهود .. فتح بقه وأخد دواه وهي شربته مياة في صمت ودلال رهيب منها ليه ....

في اللحظة دي، جلال عرف إن الحزن مش دايمًا نهاية... أحيانًا بيكون بداية تصالح مع النفس، وبداية رجوع بطيء لحاجات اتكسرت بس ما ماتتش... عرف إن الحب الحقيقي مش اللي مفهوش مشاكل ... لكن اللي يفضل واقف وصامد  بعد الأذى والبُعد ...

_ بحبك أوي...

قال جلال بعد ما أخد دواه ... فبصتله هي كمان بحب .. شدها جلال علشان تقعد في حضنه .. قعدت وحاوطت رقبته بإيديها ومشت ايديها في شعره وهي بتبصله بحنان كبير ..

_ أنا كمان بحبك يا حبيبي ..

وخدت راسه في حضنها وهو غمض عيونه وحس انه ارتاح ... ارتاح من كل هموم الدنيا في حضنها ...

وبرغم كل اللي اتاخد منهم، كل الخسارات، كل السنين اللي ضاعت، كانوا واقفين جنب بعض دلوقتي، من غير شروط، من غير دفاع .... اتنين فاهمين إن اللي بينهم اتجرّح… لكنه لسه حي وقوي.... فاهمة انه جوزها وطالما اختارت تسامحه  ... يبقى لازم يسعوا ان حياتهم تكون طبيعية مش قايمة على أحقاد وغلطات الماضي ...

_________

في اليوم التالي كان جلال صاحي مع الفجر ... اتوضى وراح يصلي ورضا كانت صاحية معاه طول الليل لأنه معرفش ينام ...

جلال بعد ما خلص صلاة رجله أخدته لقبر أمه ... وهناك وقف أدامه يتأمله ويقرء اسمها المحفور عليه وهو مش مصدق لسة انها خلاص ماتت وراحت .... عدى على قبر جدته ... وهنا وقف ودمع تاني بعد ما عيونه نزلت دموع أدام قبر أمه  ... فريدة حبته وانجي كرهته .. لكن الاتنين أذوه...

رجع البيت مع النهار وهنا لقى رضا مستنياه وباين عليها القلق ... قرب منها بخطوات هادية وهو بيسألها

_ صاحية بدري كدة ليه يا حبيبتي؟

_ مبتردش على تليفونك فقلقت ...

قالت فطلع جلال موبايله من جيبه ولقى الصوت مقفول وهنا بصلها بأسف وقال

_ كان سايلنت ..

هزت راسها بتفهم ورجعت تسأله بخوف وقلق

_ طب أنت  كويس النهاردة ؟

قرب وقال بابتسامة بسيطة

_ أحسن كتير  من امبارح...

_ بجد ؟

_ بجد لدرجة حاسس إني تجاوزت الموضوع ...

وبعدها ابتسم جلال ابتسامة واسعة وقرب منها وحضنها ...

_ شكرا انك وقفتي معايا اليومين دول وانتي مش مضطرة .. شكرا يا حبيبتي

اتعلقت في حضنه وفرحت انه بقى كويس وبان على وشه وصوته وحتى هدوء جسمه ... وكأن أكثر ما صدمه كانت الوفاة وبعدها مفيش حاجة حلوة يفتكرها عشان يحزن عليها ... حضنته وهي بتقوله

_ عمري ما أقدر أسيبك لواحدك يا جلال ..

_ ربنا يخليكي ليا وميحرمنيش منك أبدًا ..

رد بهمس وهو بيبوس راسها ... وهي مستكينة في حضنه ... بتستخبى في حضنه من خوف تاني جواها ... خوف وقلق مخلهاش عارفة تنام ولا ترتاح ...

وكأنه حس بيها فخرجها من حضنه ومسك وشها بين إيديه وهو بيسألها

_ فيه إيه يا حبيبتي مزعلك ومخوفك ... حاسس إنك مش كويسة خالص ؟

_ هنعمل إيه مع حياة ؟

نطقت رضا بخوف وهي عيونها في عيونه

جلال سكت للحظة وبعدها قال

_ حياة هتفرح بيكي ...

لكن رضا عيونها دمعت

_ دي مرضتش تبصلي ولا تبص في عيني يا جلال بعد إللي حصل

_ عشان الصدمة ... الصدمة مأثرة عليها ومن حقها ... بس هي بتحبك وكانت بتتمنى إنك تكوني أمها

جلال كان بيصبرها وفعلا كان معاه حق ... حست رضا بالإطمئنان لكنها مازالت خايفة  ... وفي عز خوفها ودموعها ... الباب اتفتح ودخل من وراهم يحي وحياة وحسين وحتى كريمة .....

رضا جسمها كله اترعش وجلال كمان حس برهبة جواه من الموقف ... دي المواجههة المنتظرة ...ولكنه كان ثابت وقوي ...

حياة كانت ماسكة ايد أخوها بتقوي بيه ...

_ صباح الخير... عامل إيه يا جلال طمني عليك

قال حسين .. وعيون رضا على حياة وعيون حياة على الأرض ونظراتها مشوشة ...

_ الحمدلله يابابا كويس ..

وقربت كريمة من جلال وقالتله

_ البقاء لله يا جلال ..

_ ونعم بالله ..

عزته رغم كل أذى تعرضت ليه من انجي لكنها عزت جلال في أمه ....

كريمة شافت الوضع متوتر وجلال ورضا عينيهم على حياة ... قربت كريمة من رضا وقالتلها في همس

_ متخافيش .. اتكلمي معاها ... أنا عرفت كل حاجة .. صدقيني دي حاجة تفرح أوي متزعلش .. فكروا فؤ فرحة انكوا بقيتوا مع بعض ... متفكروش في السنين إللي فاتت ..

كان كلامها بصوت واطي وهامس بتدعم بيه رضا وهي بتطبطب عليها .... وبعد ما خلصت قالت لحسين

_ حسين ... احنا وصلنا الولاد واتطمنا على جلال ورضا .. يلا نمشي ...

حسين فهم انها عوزاهم يختلوا ببعض ... كعيلة صغيرة ... وحسين التزم بكلامها وخرج وراها بعد ما طبطب على كتف جلال وهو بيقويه ... ___ _ ربنا يصبرك يا بابا ...

جملة قالها يحي وهو بيقرب من جلال .. وأخيرًا علق على موت انجي ... لكنه مكانش بيحبها وكان بيكرهها بسبب إللي عملته في أخته وأهله وبعد كل إللي اكتشفه بقى موتها حتى مش شافي غليله ...

أما حياة فكانت واقفة في نص الصالون، عيونها مش عارفة تبص فين، قلبها بيدق بسرعة مالهاش آخر، وإيدها مش عارفة تهدى وفيها حركة توتر ... قدامها رضا، اللي كانت طول عمرها فاكرة إنها فقدت بنتها من يوم الولادة، ولما اكتشفت إن البنت دي موجودة قدامها، حقيقية، حية مقدرتش تقولها ولا تاخدها في حضنها ... وما كانتش تتخيل اللحظة دي هتيجي.... وان بنتها تعرف .. وتيجي لحظة المواجهة الكبري

رضا وقفت قدام حياة ، كأن الزمن كله اتجمد حواليهم.... عيونها مليانة دموع ، لكنها مش عارفة تبدأ تتكلم ولو بكلمة ... كل اللي قدرت تعمله إنها تمد إيديها ، إيديها المرتجفة ، كأنها عايزه انها تمسك حياة من غير ما تخوفها ....

حياة ما ستوعبتش في الأول وفضلت واقفة مكانها ساكتة .... قلبها كان هيقف  في كل مرة رضا تتحرك فيها خطوات ....

رضا تخطت جلال بخطواتها بعد ما كانت واقفة وراه ... حياة كانت مكانها ولكن يحي تراجع فلفلته وبصتله بخوف وكأنه سابها أدام النار لوحدها ...

الخوف والصدمة كانوا عاملين زي جدار كبير ، بيخليها مش قادرة تتحرك ، مش قادرة تتنفس كويس ...فجأة، رضا انحنت نايحتها شويه وقالت بصوت مكسور

_ حياة… أنا … أنا أمك …

جملة وحيدة متقطعة من شدة التأثر وبس و الدنيا كلها اختفت من عيون حياة  .... ومبقتش سامعة غير الكلمة ومش شايفة غير رضا أدامها وكأن أبوها إللي واقف مترقب وخايف من ردة فعلها مش موجود وكأن حتى يحي مش موجود  .... الدنيا كلها بقت أمها وهي وبس ..

" أمك " الجملة اترددت جواها بصوت طفلة صغيرة كانت نفسها في أم حقيقية ليها .. " ماما "  كأنه صوت خافت بس عامل زلزال جواها .. الدمعة وقفت في عينها قبل ما تسقط ، وجسمها كله اتجمد .. مش مصدقة .. يحي حكالها كل حاجة .. فهمت كل حاجة .. لكنها مازالت مش مصدقة  .. دماغها حاولت تفكر ، العقل رفض يستوعب ، والوجع من طول السنين كلها ظهر فجأة في ثانية ..

لكن بعد ثواني ، ثواني بسيطة ، قلبها بدأ يسيب الخوف شوية ، ويستقبل الصدمة .... الست اللي قدامها دي و اللي كانت طول عمرها غايبة … هي أمها ؟! كل المشاعر اللي اتدفنت جوهها بدأت تطلع ... الشوق ، الحنين ، الغضب من كل يوم ضاع ، الفرحة الكبيرة اللي ماكنتش عارفة تعبّر عنها ...

حياة اتحركت ببطء ، خطوة خطوة لرضا... إيديها بدأت ترتجف ورفعت إيديها وجسمها كله بيترعش  وهي بتمسك إيد أمها .. رضا نفسها ما كانتش قادره تتحرك بسرعة كفاية من الحزن ، بس لما اتجمعوا إيديهم ، كان كأن الزمن كله وقف .... كل الصدمات ... كل الخوف ، اتحولت لدُموع من الامتنان والفرحة..

_ وأنا… أنا موجودة… أنا حية…

حياة قالتها أخيرًا، وكأنها محتاجة تسمع صوتها عشان تصدّق انها في الواقع وعايشة .. وان دي أمها

رضا ضمتها بكل قوتها ، لدرجة إن حياة حست بالدفء كله اللي فاتها طول عمرها

_ انتي ماما بجد ؟ ماما الحقيقية !

كانت حياة بتسأل وهي مش مستوعبة

_ أنا أمك يا حياة ...

_ انتوا مش بتضحكوا عليا ! قوليلي بالله عليكي .. متعشمنيش .. متقوليلش حاجة عشان تفرحيني وترجعي تقوليلي كدة ..

حياة بصت حواليها وهي بتسأل أبوها ويحي ... ورجعت تاني تبص لرضا إللي مسكت وشهو وقالتلها

_ أنا هنا… أنا موجودة… ومش هسيبك تاني... أنا ماما والله العظيم أنا مامتك ..

الدموع ابتدت تنزل على وشوشهم وخصوصا حياة اللي صوت بكاها ارتفع جدا ، مش بس حزن أو ألم ، ده دموع شوق وفرحة وشكر .... كل ثانية اتأخرت في الحياة اتحولت للحظة احتضان مهيب، للحظة استسلام للعاطفة، للحظة كانت قلوبهم هي اللي بتتكلم ومفيش كلام تاني خلاص يقدر يوصف المشهد  ...

يحي راح وقف جنب أبوه وهو عيونه بتنزل دموع في صمت وحتى جلال كان زيه .. الحقيقة كانت صدمة ليهم هما الأربعة  .. مكانوش يعرفوا أي حاجة وفجأة يكتشفوا انهم عيلة واحدة .. عيلة كاملة .. لكنها عيلة كانت ضايعة عن بعضها ...

_ قبلاني ... قابلة إني أمك ؟.

سألت رضا وسط دموعها وما كان من حياة إلا إنها هزت راسها عدة مرات بسرعة وضمت رضا ليها أكتر وكملت بكاء في حضنها ...

_ سمعيني يا حياة .. طمني قلبي يابنتي ..

حياة بالكاد ردت ورغم ان نبرتها خرجت هامسة إلا إنها كلها تأكيد وتطمين لرضا

_ أنا ما صدقت لقيتك .. ما صدقت ...

ابتسمت رضا ويحي جلال حضنه هو كمان عشان كان بيعيط ... وباس راسه وهو بيهمسله بكلمات كلها حب ودفئ لإبنه المجروح  ...

وقرب جلال من حياة واخدها في حضنه ويحي حضن مامته .... جلال طبطب عليها وغمض عينه وهو حاسس بمدى تعب بنته .. وقلبه حزين انهم مروا بكل دا ... ويحي بيحضن مامته بحب كبير وحزن كمان بسبب مرارة الأيام إللي فرضت عليهم سنين عذاب ...

تقاعلوا على بوست الفصل على فيسبوك❤️ اسم الصفحة Rewaiat romantica روايات رومانتيكا