الفصل الأربعون
جات انجي قطعت كلامهم وهي سعيدة ومبسوطة فضحك جلال على سعادتها وخدها في حضنه وباسها وحسين واقف مش راضي عن أي حاجة بتحصل لكنه قبل عشان جلال وبس ، وراحوا عشان ياكلوا لكن رضا فجأة حست بألم وهي شايفة نسيمة بتبص لجلال بنظرات غريبة ! حاولت تطنش لكنها رجعت لقت جلال ونسيمة نظراتهم قوية وبيركزوا على بعض !! لكنها قررت إنها مش هتقول أي حاجة غبية ممكن تخليها تخسر جوزها ، وكفاية أوي المصايب إللي في حياتها وكمان جلال وعدها انه مش هيخونها تاني ... ولكن الوضع ساء والتوتر تعبها جدا
_ جلال...!
نادت رضا لجلال بعد ما حست بألم في بطنها من الغيرة وبسبب تأثير الحالة النفسية ، رد جلال ببعض الضيق
_ايه يا رضا ؟
بانت على ملامحها الألم وكل اللي قاعدين لاحظوا وأول ما جلال بصلها اتصدم من شكلها المتألم وقالت رضا قبل ما تصرخ
_ الحقني !
اتنفض من مكانه وهو خايف وقلقان عليها وشالها باهتمام كبير تحت عيون نسيمة وأمه إللي اتغاظوا واتضايقوا من اهتمامه بيها وخوفه عليها وجلال بيضم رضا بين ايديه بحنان
_ تعالي يا حبيبتي ، اهدي هجيب الدكتور وهتبقي بخير..
وخدها وطلعها فوق في الأوضة وجاب الدكتور وإللي طمنهم على حالتها وإللي حصل بسبب التوتر والزعل ...
_ شكراً يا دكتور .
قالها جلال للدكتور وحسين هو كمان شكر الدكتور وقال حسين
_ هات الروشتة أنا هروح أجيب الدوا !
وخد الروشطة ومشي بعد ما اتطمن على رضا وشاف إللي حصل دا فرصة إنه يمشي ويروح عند كريمة ويخلع من التديبسة إللي اتدبسها تاني !
جلال راح يوصل الدكتور أما انجي ففضلت مع رضا في الاوضة وكالعادة مينفعش تقعد في مكان إلا لما تبث سمها فيه
_ حلوين الشويتين إللي عملتيهم تحت دول عشان تلغوشي على فرحتي
رضا مردتش وكانت نايمة على السرير تعبانة ومش فايقة لكلامها دا
_ طب حتى قوليلي مبروك
ردت رضا _ مبروك على إيه ، ماهو مبيحبكيش
_ مانتي كمان جلال مبيحبكيش !
قالتها انجي ببساطة فجالها رد رضا الشرس
_ جلال بيحبني غصب عنك وجايله إبن بعد كام شهر يا حبيبتي..
فردت انجي بخبث _ مش إبن واحد يا قلبي!
_ عارفة !
انجي كانت عارفة من الرقاصة إن رضا راحتلها ولكن انجي قالت الصدمة الكبيرة بقى
_ وعارفة إنها حامل في توأم !
وش رضا أصفر وسكتت تماماً وبقها اتفتح بطريقة تدل على إنها مش قادرة تستوعب إللي سمعته !
ضحكت انجي وقالت _ اتصدمتي كدة ليه ؟
عيون رضا دمعت ووشها إللي أصفر رجع بقى أحمر جدا بعد ما أخيرا استوعبت وأدركت إللي سمعته ! إللي سمعته مصيبة كبيرة نزلت على قلبها دمرته !
وانجي مستمرة في كيدها
_ لأ وصحتهم كويسة أوي ، جسمها قوي وكبيرة ومستحملة ! وجلال كان سهران عندها امبارح
رغم الصدمة الكبيرة إللي وقعت عليها إلا إن رضا قالت ببطئ والدموع بقت تقيلة على عيونها وبتحارب عشان تنزل
_ جلال كان بايت في أوضة فريدة
ارتفعت ضحكة انجي في خبث كبير وتسلية
_هههههههه آه فريدة ، هو كان في اوضة فريده فعلاً مش هختلف معاكي ، بس بيعمل إيه ، دي فيها كلام تاني
_ قصدك ايه !!!؟
سألت رضا بلسان تقيل وهي خايفة من أفكارها اللي خدتها لحتى هتجرحها بسبب كلام انجي وتلميحاتها
انمحت ابتسامة انجي وحلت محلها نظرات صريحة بالشماته وقربت من رضا وقالت
_ قصدي إن جلال لقى حبه الحقيقي خلاص
ترقبت رضا الكلام وأعصابها على أخرها ومستينة تسمع الكلام إللي كانت حاسة بوجوده !
_نسيمة !
انتفض قلبها ودموعها نزلت لما سمعت الإسم وعجزت عن الكلام وانجي بتكمل وبتقولها الحقيقة المرة
_ جلال أتجوزك عشان الورث يا رضا ، وصية كتبتها فريدة حبيبتك إنه لازم يتجوزك ويخلف منك أحسن فلوسه تروح ليكي انتي ، كتبالك جزء كبير من ورثها ولو الوصية متنفذتش فلوسها تروح لاهل البلد ! وكان لازم يخلف منك عشان تربطه بيكي العمر كله. ،. بس جلال بقى كان بيديكي حبوب منع الحمل وكان بيقرف يقربلك ، دا أنا كنت بتحايل عليه والله
كلامها كان قاسي ومشفقتش على إللي بتموت من الألم أدامها ومش قادرة تتكلم ولا تنطق من الصدمة ، عيون رضا اتفتحت أكتر والقهر بان فيهم والشعيرات الصغيرة في عينها كانت هتنفجر من الاحمرار والضغط ودماغها صدعت وحست إن الكون كله بيلف بيها ، بصتلها انجي من فوق لتحت بقرف
_حتى الفلوس مكانتش مخلياه يقدر يقرب منك ... شوفتي بقى !
كل إللي خرج من رضا كانت شهقة كأنها بتطلع في الروح وحطت ايديها على قلبها ببطى كبير وبصعوبة وحاولت تاخد نفسها بصعوبة ومدت ايديها على الماية عشان تاخدها لكن انجي شافتها وابتسمت في تشفي ووقفت قصادها وقالت باحتقار وكره
_ اعرفي مقامك كويس ،، أنتي واحدة خدامة ، مش هكررها كتير يا حبيبتي ، إبني راجل اتسلى معاكي شوية بس مكونتيش مالية عينه فخانك ، بدل المرة ألف ، بصراحة صعبتي عليا قولت أقولك وأعرفك وأنور بصيرتك .. بس بعد إللي سمعتيه دا ! أكيد هتتمسكي بيه أكتر ، لأنك بتحبي الفلوس هههههه
خبطت الكباية في ايد رضا ووقعت على الأرض واتكسرت ! وانجي ضحكت عليها وخرجت ورضا فضلت عيونها مبرقة والدموع بتنزل من غير ما اقدر تسيطر عليها! والصدمات بتتوالى عليها والحقيقة المرة بتنكشف ! عشان كدة جلال اتجوزها! مش حبا فيها ولا حتى شفقة !, دا اتجوزها عشان وصية !!! .. وصية فريدة !!!
بكت رضا بحرقة ونحيبها اتحول من حزن وبكاء عادي لبكاء ملئ الأوضة كلها ... حطت ايديها على بطنها! مينفعش تنسحب دلوقتي! مينفعش تمشي ! الأول كانت بطولها كانت تقدر تمشي وتروح في أي مكان حتى لو هتتذل وهتتمرمط لكن دلوقتي! .. دلوقتي مفيش أي حاجة في ايديها
حاولت رضا تقوم .. لكن انتهى بها الأمر نايمة على السرير غرقانة في نوح مفاجئ وعميق وكأن من شدة الحزن مقدرتش تتحمله وملقتش غير ملجئ النوم تقع فيه !
رجع جلال يشوفها لقاها نايمة. والكباية مكسورة جمبها على الأرض! ..
استغرب لكن لما قرب لقى دموع على خدها فحس أد إيه هي بتتألم .. نزل يستعجل أبوه إن يجيب الدوا وييجي لكن الغفر قالوله إنه راح بيت البحيرة !
بص جلال نظرة حقد على أبوه إللي دايما بيتخلى عنه ، حتى مخافش على حفيده وراح يجري على عيلته التانية إللي ولا من دمه ولا من صلبه ! هه ابتسم جلال بسخرية مريرة لما افتكر إن قريب أوي حسين هتربطه بالعيلة دي طفل من دمه ، مش هيبقى ناقصهم حاجة في حين إن هو ناقصه كل حاجة ! ....
________
_ جلال !
هتفت بيها نسيمة لجلال إللي جه من وراها يلمس كتفها بهدوء فضحك جلال بخفة وهو بيقولها
_ خضيتك
ردت بابتسامة خجولة _ أيوة
سرح فيها جلال وفي رقتها وفي جمالها وقال
_ بحب لهجتك أوي ، مختلفة عن الناس إللي هنا
بصتله بعيون مستغربة فكمل شرح
_ يعني رقيقة ، مش بحب لهجة الريف
قالت _ بس أنت من الريف !
لكن جلال قال بسخرية فيها احتقار وعنصرية
_ مش بحب الريف كله على بعضه أصلا
هزت راسها _ ماشي ..
رقتها خلت جلال يقربلها وصوته يذداد بحة وتميز ويميل عليها يسألها سؤال ليه مغزى عن إللي حصل بينهم
_ عاملة إيه دلوقتي؟
ردت وهي بتعدل شعرها لورا
_ احم كويسة ...
عض شفايفه وكتلة الرقة دي كلها أدامه
_ دايما يا نسيمة ..
اتكسفت وبصت في الأرض فسأل جلال وهو بيحط ايده على شعرها وبيشغلها بسؤاله
_فريدة عاملة إيه النهاردة؟
ردت ببراءة وبحب _ فريدة هتصحى ، أنا متأكدة!
ضحكلها ضحكة جذابة خفيفة وقال
_ واو .. ومتأكدة كمان !
_ أنا واثقة ، مش أول حالة عندي تبقى زي فريدة على فكرة
كان بيبص لشفايفها وهي بتتكلم ولبراءتها وقال وعيونه عليها
_ انتي حلوة أوي
وشها أحمر من الكسوف فمسك جلال خدها برقة
_ بحب خدودك لما بتحمر وانتي مكسوفة
رفعت راسها وعيونها الواسعة اتعلقت بعيونه وقالت على غفلة
_ أنا كمان بحبك !
اتفاجىء جلال من اعترافها لدرجة إنه سأل تاني عشان يتأكد
_ بتحبيني ؟!
لكنها أكدت على إللي قالته
_ بحبك أوي يا جلال
_ حبتك عقربة يا لمامة يا زبالة يا واطية يا قليلة الشرف
صوت رضا جاب آخر الشارع وبص جلال بهلع ليها وهي داحلة تخلع شبشبها وبتنزل بيه فوق راس نسيمة .. جلال من الصدمة اتفرج على نسيمة وهي بتصوت ورضا مش سيباها شتيمة وضرب رغم تعبها ورغم إنها مش قادرة بس غيرتها وغيظها كانوا أكبر بكتير وطلعت في نسيمة كل غضبها وجلال استوعب وبدأ يحوش وهو بينادي على رضا
_ رضاا، بس يا مجنونة أنتي بتعملي أي
_ سببني عليها الكلبة خطافة الرجالة ، عاملة فيها محترمة لا يبت دا أني عرفاكي من أول يوم
وشدتها من شعرها ورمتها في الأرض وجلال في موقف لا يحسد عليه ولا عارف يحوش دي ولا عارف يدافع عن دي لحد ما صرخ فيهم هما الاتنين وقال
_ بس بس ، فريدة موجودة يا غجر
هنا رضا سلخت نفسها من فوق البت نسيمة إللي حرفياا خلتها تنزل دم من وشها وشفايفها وخلعت شعرها في ايديها ونزل جلال يتطمن على نسيمة لقى رضا بتشده وبتقوله وهي بتشده بعنف من دراعه ونسيمة عماة تتأوه وتعيط من شدة الألم
_ أنت بتطمن عليها هي !!!
هتف فيها جلال بعصبية _ اخرسي خالص أنتي كنتي هتموتيها
قتلته رضا بنظراتها الشرسة والقوية وهي بتبصله بعد كلامه وهنا دخلت انجي وهي بتقول كأنها مخضوضة
_في إيه صوتكوا عامل كدة يا ساتر يارب
خرجت رضا من الاوضة وخبطت في كتف انجي بعنف ومردتش عليهم فمثلت انجي الألم فراحلها جلال وقال بغضب
_ أنا آسف يا ماما أنا هربي الشرشوحة دي كويس ، شوفي نسيمة لو سمحتي
وخرج بغضب بعد ما انجي هزت راسها بالموافقة ومعالم المسكنة مرسومة على وشها ....
_____
_البت دي لازم تمشيي يا جلال
ضربت رضا على الطرابيزة وهي بتبص لجلال بتحدي إللي جه وراها يعاقبها على تصرفها
_ ياني يا هي
بصلها باستهزاء من فوق لتحت
_ لما تعرفي تتكلمي كويس الأول
حطت ايديها في وسطها وسألت
_ وماله كلامي بقى ياسي جلال
لكن سخريته هو كانت غير وهو بيسخر من كلامها
_ انتي حتى مبتعرفيش تقولي أنا !!
_ هه وأني أقولها ليه ياخويا
لكن جلال بصلها بعنف وقال
_ مبحبش أني ديي !!!! مبحبش كدة ، إسمها أنا
رفعت حاجبها ، حاجة غريبة بتحصل في جلال ! في البداية كان بيحب لهجتها ، دلوقتي لأ! مش عجباه وبيسخر منها .. لكنها متهزتش والحزن والصدمات إللي خدتها خلتها تقاوم سخريته وتقول
_ دي لهجتي وأصلي
_ لهجة بقرف منها .. وايه أصلك دي ، إيه دخل اللهجة في الأصل
رده التلقائي كان قاسي خصوصاً فكرة إنه مفكرش فيه وهو بيقوله ! .. رغم جرحها منه لكنها قالتله بصبر على أذاه
_ البندر ليهم لهتجهم أول ما يتكلموا تعرف إنهم بندر .. والفلاحين ليهم لهجتهم أول ما يتكلموا تعرف انهم فلاحين .. اشمعنا بتعتز بدول وبتقرف من دول
بصتله بقوة وكملت تسأله بحده وحزم
_.. اشمعنا بتشوف إن دول دي لهجتهم عادي يتكلموا بيها وبتيجي علينا احنا عاوزنا نغير لهجتنا عشان مش عجباك
نظراته كانت كلها سخرية وعدم رضا وهنا رضا فقدت كل ذرة صبر عندها وقالت بقرف وبشراسة
_عنها ما عجبتك ولا عجبت حد خالص يا جلال .. وأني فلاحة وبتشرف إني فلاحة ، كفاية إن حتى الأكل إللي بيصلب طول البني ادمين وبيتحط على سفرة الباشا ولا طبلية البسيط كلها نتاج تعب وشقى الفلاح في أرضه ..
بيبصلها جلال بسخرية وبيأبى الإعتراف إنها كلامها صح ومنطقي وانها أقنعته
وبيتوجه ناحية الباب عشان يخرج لكنها بتوقفه بسؤاله الشائك
_ جلال .. أنت عملت حاجه مع البت دي ؟
وقف مكانه .. هيرد يقول إيه! قول آه يا جلال عشان تخلص منها وتسيبك زي ما عرفت خيانتك أول مرة ويخلالك الجو مع البنت الجديدة نسيمة !
شيطانه قاله كدة لكن لسانه اتردد وقال
_ لأ .!
وخرج وسابها وراه تبص في أثره بعد ما قلبه ولسانه رفضوا فكرة مصارحتها خوفاً من إنها تبعد عنه تاني ولأنه مش عاوز يعيش الشعور إللي عاشه وهي بعيد أبدًا !
________________
عدى شهرين ، جلال ورضا معاملتهم مع بعض قليلة جدا ومفيش أي احتكاك بينهم وجلال هيموت ويقربلها لكنها رافضة كل تلميحاته ومحاولاته ... بعد إللي عرفته إنه اتجوزها عشان الورث وإن الرقاصة حامل في توأم وكمان نسيمة في شك إن بينه وبينها علاقة ، مكانتش قادرة تمنحله نفسها أبدًا .. وانجي مترقبة أي حركة غير طبيعية تحصل في علاقتهم لأنها قالتلها الحقيقة وسبب جواز جلال منها وكمان قالتلها إن الرقاصة حامل في توأم ! لكنها كانت كل يوم بتشوف جلال وهو كل تركيزه على رضا ، نظرااه كلها جوع ليها ! .. نظرات كلها حب وشوق ودا عكس اللي هي خططت ليه تماماً! وفي الجانب الآخر بتشوف رضا باردة معاه وبتعامله بجفا وجلال بعد عن نسيمة وكل إللي بقى شاغله إن ىضا بعيده عنه ودا مش حلو ومش دا إللي هي خططت ليه !! ..
رضا بقت في الخامس ، جسمها ذاد وبطنها ظهرت بقوة ... ولكن شكلها كان جميل وحلو أوي وكل يوم في الحمل بتذيد جمال أكتر وحيوية رغم إن الحمل دا متعب جدا وكل شوية عند الدكتور بس هي بتكبر وبتحلو ..
جلال نايم في السرير في الأوضة بيراقبها ، بتتحرك يمين وشمال بتدهن على بطنها كريمات ومراهم زي ما كريمة مراة أبوه قالتلها ! لأن كريمة ورضا بقوا صحاب جدا خصوصاً بعد ما كريمة كانت هتخسر علاقتها بحسين بسبب رجوعه لانجي لكن رضا هي إللي اتوسطت بينهم وحلت المشكلة وبقت هي وكريمة يروحوا يتابعوا الحمل مع بعض وسط رفض جلال القاطع إللي مش متقبل لحد دلوقتي وجود أخ تاني ليه في الحياة دي ومن أم تانية كمان ! لكن رضا كانت بتفرح وهي شايفة جلال مخنوق ومتضايق وبتحس إنها بتاخد حقها وبتفش غلها إللي في قلبها من ناحيته فيه .
لكن المرة دي غير ... جلال عقله هيشيط وهو بيفتكر كلام أمه إللي لمحت بيه وهما قاعدين سوا النهاردة ...
_مامته بتقولي إنها سمعته بيقول إنه هيسافر مع واحدة بعد كام شهر ، بس مقالتش المعاد بالظبط ، مش شايفها حاجة غريبة يا جلال !
تأفف جلال أمه إللي بيخليه يركبه ميت عفريت وحاول يخلى الموضوع طبيعي وإنه مش قلقان وقال
_ غريبة ليه مازن راجل ومن حقه يحب ويتجوز
لكن أمه بأسلوبها الثعباني كملت
_ آه بس، يعني ليه مأجلها كدة ، وطالما قال هيسافر معاها دا معناه إنها هنا ...
غمض جلال عيونه وكلامها بيرعبه حرفياا ليكون مازن عاوز يسافر مع رضا وهتف جلال في زهق
_ أنا مالي يا ماما
قالت انجي بمسكنة _ مالكش يا حبيبي ، أنا بس بكلمك وبفتح معاك كلام ... وبعدين أصل مامته هتموت من القلق والخوف لتكون واحدة ضاحكة عليه وأنت عارفه ابنها الوحيد
قال جلال بنفاذ صبر _ ماما ممكن كفاية كلام عن مازن وأمه عشان أنا أصلا مبحبهمش
_ مبتحبهمش إزاي دا صاحبك ومامت
قاطعها جلال بقوة _ مبحبهمش وخلاص ، لو سمحتي كفاية ...
دار في دماغه الحوار ! معقول رضا تكون هي البنت إللي هتهرب معاه ! لكن هتهرب معاه إزاي وهي متجوزة ! لكن جلال افتكر أنه لازم يطلق رضا بعد الخلفة ! رجع تاني بأفكاره يقول لنفسه وابه إللي خلاه لازم ! مفيش حاجه اسمها لازم أنا إللي أقرر بس. ، بس يا جلال هتفضل هنا مربوط بيها طول عمرك ! فين حريتك وسهراتك وحياتك ، أفكار جلال كلها متناقضة بين حرية عمياء وبين إخلاص وزواج ومسؤولية هو شايف أنه مش ادها أو بالأحرى هو أصلا مش عاوزها ...
_ مهتمية بنفسك أوي!
قالها جلال إللي كان ساند ضهره على السرير ومتمدد وفاتح قميصه وجسمه ظاهر وشعره مش مترتب وأفكاره مش رحماه ورفضها المتكرر ليه خلى الشك في قلبه يذيد أكتر ، وخصوصاً لما عرف إن كان فيه مكان تالت هي راحته لما خرجت ومقالتلوش عليه! ودا خلاه يربط الأحداث ببعض ويحط احتمالية إنها ممكن تكون شافت مازن يومها !
ردت رضا وهي بتكمل دهن جسمها وترتطيبه كويس عشان ميطلعلهاش علامات تمدد الحمل على بطنها
_ وأني مش ست ولا إيه
سحب جلال نفس وهو بيبصلها وبيتأملها وبيقول بنبرة ليها مغزى هي فهماه كويس
_ لأ ست ... ست أوي كمان
بصتله من المراية ، شكله فاتن وخصوصاً بالنسبة ليها لأنه الراجل الوحيد بالنسبة ليها في الدنيا لكنها مدتش أي إهتمام ولا عبرتله عن أي مشاعر وقامت تنام على السرير بسهولة وأحبطت جلال وتعابيره إللي كانت مستنياها تبدي إعجابها الشديد بيه زي ما عودته إنه على أقل حاجة هي بتدعمه وبتشكر فيه وبتميزه ...
جات نامت على الجنب التاني من السرير وأول ما اتغطت واستقرت في النوم لقت جلال لازق في ضهرها بقوة ونفسه سخن مولع زيي جسمه وبيمشي نفسه على رقبتها المكشوفة وبأطراف أصابعه بيتلمسها من فوق ملابسها برقة متناهية
_ عاوز ايه ؟
سألت رضا وهي مسيطرة على نفسها بقوة ، وهو مستمر في محاولة إغواءه بسحره إللي هيتجنن إزاي مبقاش يأثر فيها الفترة الأخيرة
_ بتتهربي مني ليه ؟
كان سؤاله بهمس مثير لكن ردها كان بقوة
_ وانت بتتقرب مني ليه طالما مش عجباك !
قربلها أكتر .. عاوز يحس فيها بكل جزء فيه ، مكانش متخيل إنها لم تبعد عنه هيتجنن أوي عليها باالشكل دة لدرجة إنه نسى أي ست تانية وكان بيحاول يجذب رضاها هي رغم شكوكه فيها ورغم خناقتهم سوا إللي كانت ذايدة آخر فترة لكنه كان فعلاً من كل قلبه مش قادر يتحمل البعد ...
همس وهو بيقول بصدق ورقة
_ مين قال مش عجباني ...
حط ايده على وسطها وغمض عيونه وهو بيشم ريحتها الجميلة إللي اشتقالها
_ عمري ما قولت كدة ، انتي دايما عجباني
_ بس أنت اللي مش عاجبني
جملتها كانت صادمة ليه! .. قالتها كأنها مفكرتش قبل ما تقولها ولو للحظة !
لقى لسانه بيقول بتلقائية _ مازن اللي عاجبك !