الفصل الواحد والأربعون
التفت ليه وعيونهم اتلاقت وقالت كأنها مش مصدقة إللي سمعته
_ مازن مين ؟ صاحبك !
رد جلال بسرعة وعنف وهي لسة في حضنه وعيونهم مفارقتش بعضها في مشهد عبر عن العشق والكره في نفس الوقت
_ روحتيله ! روحتيله يا كدابة و هو كمان مكانش في البيت وكدبتي عليا وقولتي إنك خرجتي من عند الدكتور روحتي لأمك بس
رمشت رضا وكأنها في دنيا تانية إن جلال بيشك فيها بالطريقة دي واستوعبت حالته الغريبة وخناقه معاها رغم محاولته التقرب ليها لكن في نفس الوقت كان بيفتعل أي خناقة معاها أول ما يختلوا ببعض
_ عشان كدة متغير ! كل الأيام دي مفكر إني روحت أقابل راجل غريب !
نظراتهم لسة متعلقة ببعض ومردش ..
شالت رضا ايده من على بطنها وقامت وهو فضل مكانه ، شد قميصه إللي كان خلعه ولبسه تاني وسابه مفتوح .. كان قميص بيتي لونه أبيض خفيف عارف إنها بتحبه فلبسه !
عيونها اتعلقت بيه لما وقفت ادامه وهو بيبصلها بعيون كلها غضب واتهام ومش مكلف نفسه جهد إنه يشرح موقفه وكأنه متأكد من كلامه ومتأكد من خيانتها ، عضت شفايفها من الوجع وهي بتحضر نفسهل للي هتقوله ، مكانتش عاوزة تعيش نفس الألم تاني لكنها قالت باللي صدمه وكشفله قسوته عليها !
_أني روحت للرقاصة ! روحت للرقاصة اللي حامل منك يا جلال
بانت معالم التفاجئ على وشه إللي كأن حد لكمه بقوة
كملت رضا بحزن وغضب _ سمعتكوا وانتوا بتتكلموا ! مقدرتش مروحش ، كان نفسي أموتها بايدي واخنقها !!
ونزلت دموعها ومشاعر الاسف والحزن الشديد ظهروا على ملامح جلال !!! ...
حس بسكاكين بتقطع في قلبه لما عرف أنها عارفة كل دا ومستحمله ! أد إيه هو دمرها وأذاها وهي لسة بتعيط وبتصرخ
_ أمك قالتلي إنها حامل في اتنين ، أني قلبي بيتقطع يا جلال ، قلبي بيتقطع وروحي كل يوم بتموت وأنت مش حاسس ، نفسي اسيبك وامشي بس مش قادرة، مش هقدر أعيش من غيرك ، نار قربك أحسن من نار بعدك ...
قام جلال ووقف وجرى عليها ومسكها ومش عارف يقول ايه وهي بتصرخ فيه
_ كل ده وتقولي مش بحبك وعاوزة غيرك! ملعون أبو أي راجل غيرك ، يغوروا في داهية كلهم مش عوزاهم ولا عمري عوزت غيرك في حياتي
عيون جلال دمعت ... رغم أخطاءه لكن مكانش بيحب يشوفها تعيط ! مكانش بيحب بيشوف نتايج أعماله البشعة وهي بتقع عليها وبتألمها وبتدمرها
_ فيه ست تتحمل إن واحدة تاني تكون حامل من جوزها! في ست تتحمل الخيانة ! في ست تتحمل كل الأذى دا عشان راجل إلا لو كانت بتعشقه وبتعشق التراب إللي بيدوس عليه وملهاش غيره !
حاول جلال يهديها ويضمها في حضنه بسكوت لكنها كانت بترفض وهي بتقول وسط شهقاتها العالية
_ وفي الآخر تتهمني في شرفي ! ليه يا جلال عملتلك إيه عشان تعمل فيا كدة ، حرام عليك ، حرام عليك تقسى عليا كدة
نجح بعد مقاومة كبيرة منها إنه ياخدها في حضنه أخيراً وهو بيقبض عليها جامد وبيعيط بقوة بعد ما شافها منهارة وشاف ظلمه ليها في عيونها وقهرها في بكاها وصراخها وكسرة قلبها وكرامتها في كلامها
_ اهدي يا حبيبتي .. أنا آسف
فضلت تعيط وهو كمان وفجأة قال
_ أنا مقدرش أشوفك بتعيطي كدة .. أنا بحبك أوي يا رضا
صوت عياطه ارتفع كأنه طفل وهنا رضا بدأت تهدى عشان تتأكد من إللي سمعته منه وإللي أول مرة تسمعه بصدق
_ جلال !
بصلها في عيونها المليانة دموع واعترفلها وأكدلها بقوة وهو بيعيط وفي أقصى حالات صدقه
_ بحبك ... بحبك والشك كان هيموتني لما مراة ابوكي قالتلي أنه جه عندك كتير ، مكونتش عارف أعمل إيه ، لو واحدة تانية غيرك كنت قتلتها بعد إللي سمعته ، أنا بعترف إني مجنون بس مقدرتش ، مقدرتش أأذيكي !
ردت رضا بسرعة ودموعها بتسير على خدها
_ كدابة في أصل وشها ، مجاليش غير مرة واحدة بس وطردته والله وأسأل جيرانا عربيته البلد كلها شافتها يا جلال
هز راسه بالرفض وهو بيحاول يبتسم بين دموعه
_ أنا اتأكدت خلاص .. مش هسأل حد تاني ، مكانش ينفع أشك أصلا من الأول
مسك ايدبها وبصلها في عيونها وقال كأنه مهووس بيعبر عن حبه
_ زي مانتي مش هتقدري تعيشي من غيري أنا كمان مقدرش أعيش من غيرك .. في الأول أنا ، أنا مكونتش بحبك ! بس ، بس بعد كدة أنا ، كل حاجة اتغيرت فيا ، من غير ما أحس ، لقيت نفسي بحبك ومش قادر أعيش وانتي بعيدة ، أي حاجة تحصلك بحس أنها بتقلب حياتي كلها وبتخليني متوتر وممكن أعمل أي حاجة كأني مش عاقل !
مسح دموعه بسرعة ورضا بصاله وهي شايفة أحلى حلم في حياتها بيتحقق وجلال بيعترفلها بحبه بجد ! مش زي ما أمه قالت انه اتحوزها عشان الورث بس ! يمكن في الأول اتجوزها عشان الورث لكن دلوقتي هو بيحبها بجد ودا إللي رضا اتأكدت منه النهاردة وهو بيقول زي المهووس بيها
_ خلي بالك من نفسك ، متفكريش في إللي فات ولا تفكري في الولد إللي جاي من واحدة غيرك ، مش هخلي أي حاجة تأثر على علاقتنا ببعض مهما حصل ، أنا هحمي علاقتنا بروحي. ، والغلط إللي غلطته مش هسمح إنه يدمر مستقبنا مع بعض ، مش هسمح أبدًا يا حبيبتي
نست رضا كل حاجة وعشات معاه اللحظة دي وبس وقالت
_ وأني واثقة فيك يا حبيبي ، عمري ما هفقد أملي وثقتي فيك مهما حصل
باس ايديها الاتنين بسرعة عدة مرات ودموعه غرقتهم وهي بتهتف بين ابتسامتها وملامح وجهها المتألمة
_ بحبك ، بعشقك يا جلال
_ وجلال بيموت فيكي ، بيحبك وبيحب ابننا
وشدها لحضنه بقوة كبيرة جدا وهو بيضمها وبيقولها
_ مش عاوز منك غير حضن ، حضن اتطمن بيه إنك معايا أنتي وابننا ، وحضن اطمنك بيه إني بحب وإني ليكي أنتي بس ..
ولقت نفسها بين ايديه ، بكل رقة كأنها فراشة متشالة على كفوف الراحة ...
خدها جلال وحطها على السرير برقة وقرب يمسحلها دموعها برقة فمدت ايديها ومسحت هي كمان دموعه فضحك ضحكة خفيفة بسيطة وكلها براءة وهي بتأكد لنفسها أن جلال كويس وجميل بس الظروف هي إللي صعبة ، رضا كانت صح من الأول إن جلال كويس وعنده استعداد يتغير ويكون كويس ، واهي شايفة جلال آهو بيتغير تماماً وهو بيتمدد جمبها وبياخدها في حضنه وايده على بطنها ... مش عاوز منها أي حاجة غير إنه يحضنها ويطمنها ويتطمن بيها وبس ويعوضوا بعضهم عن إللي فات كله ..
تاني يوم الصبح صحت رضا مبسوطة ونشيطة وعاوزة تحضر الفطار لجلال ومش حاسة بأي تعب خالص بالعكس اعتراف جلال ليها بالحب الصادق خلاها تحس إنها مالكة الدنيا كلها
دخلت المطبخ لقت نسيمة واقفة فيه ، وشها قلب وقربت ليها
لكن نسيمة خافت وتراجعت للخلف
_ بقولك إيه يابت ، لما تعوزي حاجة أبقي اطلبيها من حد شغال هنا وهو يطلعالك ، مش بيت ابوكي هو عشان تمشي تتمخطري فيه
رضا كانت عارفة أن مينفعش نسيمة تمشي عشان هي فريدة بدأت تتحسن على طريقة عناية نسيمة بيها وفي نفس الوقت هي مش طيقاها
نسيمة كانت خايفة منها وهزت راسها بسرعة وجات تخرج لكن رضا مسكتها من دراعها بقسوة وقالت بغيرة
_ وهنا راجل غريب عنك يا حلوة ، حتى لو انتي مش متحجبة أبقي البسي أي لبس حشمة
هزت نسيمة راسها بخوف وبالموافقة فصرخت فيها رضا بحدة
_ سامعة يابت
_ سامعة ، سامعة يا مدام رضا
ردت بسرعة فقالت رضا بتعالي
_ اسمها رضا هانم
رغم أن نسيمة ممرضة وحتى لو شغالة فمش من حق حد يعاملها كدة لكنها كانت عارفة إنها غلطانة في حق رضا وكمان كانت خايفة لتنضرب زي المرة إللي فاتت فقالت
_ سامعة يا رضا هانم
قالتلها رضا باحتقار وهي مش قادرة تنسى صوتها وهي بتعترف لجوزها بالحب!
_ غوري من وشي
طارت نسيمة على فوق ووقفت رضا نافشة ريشها زي الطاووس وفرحانة بنفسها ومن خوف البت الهلفوتة دي منها ..
ووقفت بعدها تحضر الفطار بروقان كبير لحد ما جات مفسدة اللذات كلها دخلت المطبخ تتأملها وتقول
_ بتعملي ايه عندك ؟
مكلفتش رضا نفسها إنها ترد عليها وقالت
_ بحضر فطار لجوزي يا انجي
رفعت انجي حاجبها _ انجي من غير القاب
جالها رد رضا ببرود _ اه انجي من غير القاب ، ولا عوزاني أقولك يا حماتي
لكن انجي قالت بتكبر _ انا بالنسبالك انجي هانم
ضحكت رضا بسخرية ولفت لانجي وقالت
_ تؤ تؤ تؤ ولا هقولك يا حماتي ولا هيبقى فيها انجي هانم ، كريمة حامل وهتجيب واد زي القمر ياخد منك كل حاجة ، وان كان عليا اني فاني هاخد الورث كله بمجرد اني اخلف ابن حبيبي ! وابقي سلميلي بقى على الهانم وقتها
قالت انجي _ يعني عارفة انه متجوزك عشان الورث وبردو معندكيش دم ومستمرة في الجواز
فردت رضا بدلع عشان تغيظ انجي
- جلال بيحبني وبيموت فيا وعمره ما هيقدر يسيبني يا حماتي ، ريحي بالك بقى لأن كل إللي هتقوليه مش مهم عندي ، عندك حاجة تانية عاوزة تقوليها !
ردت انجي وهي بتتأمل قوة رضا الغريبة إللي جاتلها تقريباً من السما
_ لأ .
ربتت رضا على كتفها وقالت باستفزاز
_ جدعة يا انجي !
وادتها ضهرها تاني وكملت عمايل الأكل ولا كأن أي حاجة بتحصل
وبتخرج انجي من المطبخ وبتلاقي جلال في وشها واقف متخشب فعرفت فوراً إنه سمع كل حاجة !
___
_____
_ أنتي مبتحبنيش !
قال جلال لانجي إللي خدته اوضتها وحاولت تشرحله إللي سمعه وتهديه وأول جملة قالها بعد محاولاتهو في ارضاءه وتهديته إنها مش بتحبه لكنها قعدت جمبه وحكت ايديها على كتفه
_ أنا علشان بحبك مرضتش أقولك إنها عارفة ، خوفت عليك يا حبيبي
لكن حلال هتف بحرقة وغضب
_ إزاي تخلي واحدة طماعة وزبالة زي دي تعمل فيا كدة وتلعب بيا وبمشاعري ، كل دا عشان تاخدوا الفلوس ، أنا لعبة في ايديكم للردجادي !!!
شهقت انجي وقالت بزعل كبير
_ فلوس! اخص عليك يا جلال دا أنا معرفتش إلا لما حملت ، سمعتها بتتكلم في التليفون مع مراة ابوها
سكت جلال وهو مصدوم وقلبه مكسور وحاسس بألم كبير جدا وأمه بتحكيله
_ عارفة .. ومرتبة كل حاجة مع مراة أبوها ، عشان كدة مقالتلكش إن مازن كان عندها وكانت بتذلها وبتبين إنها بتكرهها أدامك عشان أنت تعطف عليها وتعمل شوية المسكنة بتوعها أدامك ، ويا عالم ممكن تكون هي البنت إللي مازن متفق إنه يهرب معاها بعد ما تخلف !
عيون جلال انفتحت بذعر وهو بيبص لأمه ومش مستوعب إللي هي بتقوله وعقله بدأ يفكر في المصيبة دي وفعلاً قدرت انجي تدب فيه الرعب والكره والحقد تجاهها وقال جلال بين شفايفه بإصرار
_ أنا هقتلها ...
شهقت انجي و مسكت وشه بين ايديها وهي بتقول
_ إحنا لازم نسكت ونلاعبهم زي ماهما بيلاعبونا .. الولد ييجي ونحقق شرط الوصية وبس كدة ... أي حاجة تانية مش مهمة .
ردد بيها جلال بعيون كلها جوع للإنتقام
_ أنا هندمها على اللحظة إللي فكرت فيها تعمل في جلال الصواف كدة !
خدته في حضنها وهي بتقوله في ودنه
_ جلال أنت أهم حد في حياتي وأنا وأنت ملناش غير بعض ، عشان خاطري يابني متعملش أي حاجة ومتندفعش !
وهو شارد في الفراغ وكل إللي في عقله عبارة عن انتقام في انتقام وبس !
_______
__
_ جلال!
نسيمة كانت ماشية في الممر وخارجة من اوضة فريدة لكنها اتفاجئت بجلال إللي شدها من وسطها وخدها ورا العمود
بصتله بكسوف وخجل وهو بصلها بنظرة كلها شهوة وقسوة
_ ان
قبل ما تكمل كلمتها جلال باسها بقوة وعنف كبيرين لدرجة إنها حست انها هتتخنق ! أما رضا كانت بتدور على جلال بعد ما ملقيتهوش في الأوضة وفجأة لقت ضهره ناحيتها واقف عند العمود استغربت وجوده هناك لكنها راحت بابتسامة وهي بتقوله
_ بدور عليك عشان
أول ما وصلت شافت الصورة كاملة ! جلال بيبوس نسيمة! ..
نسيمة اترعبت وسلخت نفسها سلخ من بين ايدين جلال وبصت في الأرض وجسمها بيترعش وبتنهج من عنف القبلة ورضا اتصدمت والكلام طلع منها بصعوبة
_ بتخوني تاني يا جلال !
جلال نظرته متهزتش لحظة بالعكس رد بقوة وبرود
_ آه
اتشرست معالم رضا وهي شايفة بواقي روج نسيمة على شفايف جلال وراحت بعنف وغيظ وعيونها بينزل الدمع في صمت تشدها من شعرها لكن جلال دفعها بعنف وهو بيشتمها بقسوة
_ ايدك يا زبالةةة
_ روحي يا حبيبتي دلوقتي وأنا جاي وراكي !
قالها جلال بحنان لنسيمة اللي ابتسمتله ومشت وعدت من جنب رضا بخوف ، وشد جلال رضا بعنف من ايديها وخبطت في صدره وحست بألم في بطنها وهو بيقول بصوت قوي ووقح
_ إيه بخونك !! فيها حاجة دي ؟!! بخونك يا رضا ، عارفة ليه
شهقت وحطت ايديها على بقها ووشها بيبكي وقلبها بينزف وهو بيضغط على جروحها وبيضغط عل اكتر حاجه كانت بتتعاير بيها طول حياتها وهو جمالها ولون بشرتها
_ عشان أنتي وحشة ، كل حاجة فيكي وحشة حتى شكلك وحش ، هي بيضا وانتي سمرا ، هي متعلمة وممرضة وانتي جاهلة وخدامة ، هي بتتكلم لغات وانتي حتى مبتعرفيش تتكلمي عربي زي الناس !
ودفعها بعنف تاني وهو مبسوط فيها وهي بتتألم ومش قادرة تاخد نفسها ودموعها ملهاش صوت غير النحيب وهو متشفي فيها وإنها بتعيش الألم والوجع من انتقامه ليها ولسة دي البداية لسة هيوريها أيام تخليها تندم إنها عرفته في يوم
_ بخونك وهفضل أخونك لحد آخر لحظة لينا مع بعض ، ومتقلقيش ، اللحظة دي قربت أوي!
بتقع رضا على الأرض وعيونها بتنزل دموع أليمة بتحرق خدها ، نزلت تحت رجلين إللي بصلها بسخرية واحتقار
_ قومي وبطلي تمثيل
مقامتش وفضلت مكانها فنزل راسه عندها شوية وقال بكره
_ حتى لو مش تمثيل ، مبقاش يفرق معايا
لكن بعد لحظات بسيطة جدا هتف جلال باسمها بقلق شديد
_ رضا !!!!
رضا من الصدمة بتنزف دم وجلال انصعق لما شاف البقعة تحتها وجرى عليها فوراً يلحقها ويحاول يخليها تقول إيه إللي فيها لكنها مكانتش بترد عليه !