الفصل الثاني والأربعون
خدها جلال وشالها ووداها لعيادة الدكتور إللي كانت متطرفة على البلد لكنه الدكتور الوحيد الشاطر في البلد وعيادته متوفر فيها كام غرفة للرعاية وحضانة صغيرة وكانت عيادته حاجة زي مستوصف كدة وكمان ليهم معرفة خاصة بيه ودخل الدكتور ووقف جلال مستني برة غرفة الكشف متوتر وعمال يروح وييجي ، رغم انه عرف إنها حقيرة وطماعة وخاينة ومش بتحبه ومتستاهلش والمفروض إنه كرهها وعاوز ينتقم منها إلا إن مشهدها وهي بتنزف خلى قلبه ينخلع من مكانه
خرج الدكتور وقال بغضب شديد
_ مين مزعلها أوي كدة
مردش جلال ففهم الدكتور أنها مشكلة بين زوجين ولكنه حاول يداري غضبه وقال
_ أنا مينفعش اتدخل في إللي بينكم بس لو عاوز تحافظ على ولادك ، حافظ على صحة أمهم النفسية !
ردد جلال بعدم استيعاب _ ولادي !
لكن الدكتور قال في سخرية كأنه عارف إن جلال خاين وإللي بيخون معاها حامل منه في توأم
_ أيوة ، مدام رضا حامل في توأم !!
انفتحت عينين جلال من الصدمة ! توأم تاني ! كانت مفاجأة كبيرة على جلال إللي فجأة عقله سرح للحظات وهو بيسأل نفسه هيعمل إيه بالأربع أطفال إللي جاينله دول !
حاول جلال يلملم شتات نفسه لكن وشه كان أصفر
_ نقدر نروح دلوقتي ؟
_مش هينفع تاخدها
هتف جلال تاني وكأنه مستني مصيبة تانية
_ ليه ؟
وضح الدكتور ببرود _ مش هينفع تخرج من هنا إلا على الولادة ، أي فعل بسيط وأي حركة هنكون بنخاطر بالحمل
دخل جلال لرضا لقاها ساكتة ومش بتتكلم ووشها مخطوف وأصفر ..
قعد ادامها مش عارف يقول ايه وهو السبب في إللي جرالها وشعور الذنب مسيطر عليه مع الإحراج من إللي عمله فيها
_ حمدلله على سلامتك
دا إللي قدر يقوله لكنها بصت الناحية التانية عشان متبصلوش ..
_ مش هعمل كدة تاني ..
قالها بصراحة واعترف بغلطه
_ آخر مرة يا رضا .. عمري ما هخونك تاني أبدا
لكن لتاني مرة ميهمهاش أمره فتوسلها وهو بيمسك ايديها
_ عشان خاطر ولادنا ردي عليا
هنا قدر يلفت انتباهها لما بصتله باستغراب فاتسعت ابتسامة جلال مغلفة بحزن من إللي وصلوله وهو بيأكد
_ أيوة يا حبيبتي أنتي حامل في توأم ..
فرحت ! لاحظ شبه ابتسامة على وشها ، لكنها بصتله تاني وامتلئ وشها بمعالم الحزن وشالت ايديها من ايده وبصت للناحية التاني تاني وشالت أي أمل جوا قلب جلال إنها تسامحه وتكلمه
حاول يكلمها .. لكن مفيش أي رد ، عض شفايفه بحزن كبير وهو مش قادر يستحمل كل إللي بيعيشه وبيحصل معاه وعمره ما كان يتوقع حياته تكون صعبة كدة .. حاسس إنه بيخسرها وحاسس إنه هيخسرها للأبد لكن مفيش في ايده حاجة يعملها عشان ينقذ مستقبلهم مع بعض .
_____
بيفضل الحال جاف بعدها لشهور .. الحال كما هو عليه ، رضا بقت في آخر السابع وحالتها اتحسنت جدا وحالتها النفسية كمان بقت افضل خصوصاً إنها بعدت عن انجي وعن المشاكل وعن حتى جلال وخناقاته ، جلال كان بييجي يشوفها من وقت للتاني لكنها مكانتش بترضى تتكلم معاه وحش ولا كمان كانت بتتكلم مع كويس ، كانت بتعامله كأنه شخص عادي جدا ، وانجي مراحتش زارتها ولا مرة ! أما كريمة فكانت علطول عندها بتراعيها وبتطمن عليها وكمان حسين كان بيعدي عليها من وقت للتاني .. كانت فرحانة إنها مشت من البيت إللي فيه جلال إللي بيخونها رغم إنه قالها إنه مش هيخونها تاني لكنها مبقتش قادرة تشوفه ادامها تاني وكان لازم تبعد وموضوع المستشفى دا جالها رحمة من عند ربها عشان تتم حملها على خير وفي نفس الوقت ترتاح من إللي تاعبها
لكنها في يوم وهي نايمة ، قامت مفزوعة ! كابوس صعب ومرعب قومها من نومها عرقانة وبتنهج .. حلمت إن جلال بيرميها في النار ووقف يضحك عليها ! ..
وفي نص الليل قامت رضا .. قامت من سريرها ورجليها خدتها بسرعة على تحت ، برا العيادة ! كانت لابسة عباية خفيفة على حجاب شدته من جنبها مكانش مربوط كويس
_ وديني البيت يا دكتور !
جملة قالتها للدكتور إللي كان قاعد في مكتبه واتفاجئ بيها ادامه في حالة منهكة من التعب ومخضوضة بل مرعوبة
_ تروحي فين في الوقت دا ، انتي تعبانة يا مدام رضا
_ وديني البيت ، أنا لازم أروح البيت
قالتها رضا كأنها مش سمعاه ..
_ مش هينفع!
فجأة رضا هجمت على المكتب وشالت كل إللي عليه والممرضين اتجمعوا عليها وعلى صوت التكسير وهي بدأت تصرخ وتقول
_ وديني البيت !!! وديني البيت
ومكانش ينفع تاخد أي مهدئ لأنه خطر عليها وملقاش الدكتور أي فرار من طلبها غير إنه ينفذه !
_ طيب البسي حاجة تقيلة ، الجو برد
_ مش هلبس
رفضت رضا وهي لسة بتترعش وبتنهج والعرق ماليها وبشرتها زرقة كأنها جثة!
_ هاتيلها حاجة
طلب من إحدى الممرضات إللي بالفعل جابتلها شال صوف كبير لونه اسود وحطته على كتاف رضا
نزلت رضا من العيادة مع الدكتور وركبت عربيته وهي عيونها على الطريق والدكتور مستغرب حالتها لكنه مكانش أدامه غير إنه ينفذلها طلبها ...
وقفت العربية أدام البيت ونزلت رضا منها وقلبها مقبوض ، اتفاجئوا الحراس بيها لكنهم سمحوا ليها بالدخول فوراً بدون اعتراض طريقها ..
دخلت البيت .. كله نايم والخادمة هي إللي فتحت .. الوقت متأخر والدنيا هادية لكن الدوشة والخراب كله كان في قلب رضا ! مش قادرة تنسى إللي حصل في الكابوس
طلعت على السلالم وهي مرعوبة ، كل خطوة منها كانت تقيلة وعيونها لفوق وكأنها رايحة تتعدم .. اتوجهت لأوضتها
كل ما تقرب قلبها ينقبض أكتر ، جسمها كان هينشل من كتر القلق والتوتر والخوف
قربت من باب اوضتها هي وجلال .. ووقفت ! غمضت عينها ... سمعت أصوات غريبة على أي حد لكن مش غريبة عليها هي ! ... قلبها تسارعت دقاته أوي ...
وفي حركة أودعت فيها كل قوتها ، مسكت أوكرة الباب وفتحته ! ...
وهنا .. عيونها انفتحت على أخرها وانغير لونهم لأحمر قاتم .. أحمر بيصرخ بالألم وبالجحيم إللي صاحبه غرقان فيه !
شافت جلال مع نسيمة في سريرها ! ... عيون جلال اتعلقت بيها ونسيمة معاه ولا يسترهم أي شيئ حتى الغطاء البسيط !
انرعبت نسيمة وجلال عيونه فضلت عيونه على رضا ومتحركش ولا واحد فيهم وكأن الزمن وقف ... لحد ما في لحظة ... رضا نزلت ايديها على بطنها من تحت وطلعتها أدام وشها ، لقتها غرقانة دم ! .. مكانتش عارفة ترد ولا تتكلم ولا تعمل أي ردة فعل ، كل إللي حصل إنها وقعت ... وقعت غرقانة في بقعة دم خلت جلال بنتفض يشد لباس داخلي على جسمه مظبطش حتى لبسه من كتر ماهو مفجوع من هول إللي حصل ، وكل إللي حصل كان في أقل من دقيقتين ، ولكن كأنه أستمر العمر كله ! ...
وعلى الجانب الآخر في بيت البحيرة
_االحقونيييي!!!!
ارتفعت صرخات سارة ، في أواخر التاسع وخلاص هتولد والطلق جهه
جرت ليها كريمة على صوت الصريخ وتمسكت بيها سارة وهي بتبكي وبتصرخ من الألم
_ أبوس ايدك الحقيني ، أنا بمووووت
نادت كريمة على حسين بصراخ عشان يلحقها وجه وشال سارة إللي كانوا عارفين إنها خلاص بتولد ...
_ بسرعة يا حسين
صرخت كريمة في حسين وسارة عمالة تصرخ فرد عليها حسين إللي كان بيسوق بسرعة كبيرة
_ قربنا يا كريمة
بصت كريمة لسارة وحاولت تهديها وتصبرها على ألم الطلق
_ اهدي ، خلاص قربنا
صرخت سارة وهي بتعيط من الألم
_ مش قادرة
طبطبت عليها كريمة وهي قلقانة
_ معلش استحملي
وحسين ذود السرعة علشان يوصل لمستةصف الدكتور
_____
_في ايه يا جلال !!!!!
قاللتها انجي بذعر لجلال اللي نزل جري وهو لابس بنطلونه بس ومش لابس حاجة من فوق وشايل رضا على ايديه الاتنين وهي كأنها جثة هامدة
صرخ فيها جلال وهو بيجري برضا
_ رضا بتنزف بسرعة افتحي العربيةةةة
وجرى جلال برضا وهو مش لابس هدومه وامه جرت تفتحله العربية بسرعة ورضا مفتحة عيونها لكنها مبترمش حتى من الصدمة وجلال بيبصلها بعيون كلها رعب وشعور بالذنب
نزلت وراهم نسيمة بقميص جلال وهي وشها مخطوف ومرعوبة من اللي حصل واللي متوقعتهوش خالص ولا حتى اانجي اتوقعته
ادت لانجي قميص جلال بسرعة وهي خايفة من الدم المتساقط من رضا
ركب جلال العربية مع أمه وساق بيها بسرعة جنونية وحط رضا في الكرسي إللي ورا وأمه قعدت ورا مسكت رضا وهي كلها قلق ليكون حصل للولد حاجة وبكدة كل خططها هتضيع وهتروح في الأرض !
_____
في الطريق عربيتين ظهروا شكلهم غريب عن البلد وحاصروا عربية حسين في النص !
حسين اتفاجئ بيهم وهتفت كريمة في ذعر
_ مين دول يا حسين !!؟
رد _ مش عارف !!
صرخ فيه واحد من إللي في العربية وإللي كانوا كلهم ملثمين ومغطيين وشهم
_ وقف على جنب
لكن حسين رد في غضب_ أنت اتجننت يا جدع أنت
جاله زعيق الراجل تاني
_ وقف العربية بقولك
وهنا انتبهت كريمة للصوت إللي خلى كل خلية فيها تترعب وتقول برعب
_ متوقفش يا حسين دا جوزي القديم !!!
اتصدم حسين إللي كان بيحاول يتفادى ضرباتهم للعربية وهي رددت في ذعر
_ أنا عارفة صوته كويس !
ارتفع غضب حسين وهو بيكسر على عربية طليقها وهو بيهتف في عنف وتوعد
_ دا جاي لقضاه برجليه
_ متوقفش يا حسين !!!!
وفي لحظة معملوش ليها حساب طلقة خرجت من مسدس طليق كريمة واخترقت جسد حسين ! ليفقد حسين على إثرها وعيه ويفقد التحكم في السيارة وتقع العربية في الترعة جمب إحدى الأراضي الزراعية! ......
_____
_ في إيه يابنتي !!
سألت انجي أحدي الممرضات وهي بتجري في الممر داخلة الغرفة فردت الممرضة بسرعة
_ الولادة متعسرة جدا
المستوصف كله كان بيجري ورا بعض عشان حالة رضا الخطيرة وجلال متوتر ووشه كله عرق وتعب رغم البرد القارص ولابس قميص خفيف مبهدل وبنطلون ساقط وشكله كأنه خارج من حرب وأمه واقفة جمبه قلقانة جدا ..
جلال مش عارف يزعل على إيه ولا على إيه! عليها وهي شيفاه بيخونها في اوضتها ولا عليها وهي ولادتها متعسرة ومش عارفين يولدوها بقالهم أكتر من ساعة !! وكل دقيقه بتعدي فيها خطر عليها وعلى حياة اولادهم
___
دا إللي قالوه أهل الأرض إللي كان جمبها بيت وسمعوا صوت سقوط العربية في الترعة وسمعوا صوت ضرب النار !
راحوا لقوا العربية نصها في الترعة والنص إللي ورا لسة على الجرف
أهل الأرض نزلوا بسرعة عشان يحاولوا ينقذوا إللي فيها وسمعوا أنين متألم جدا وحاولوا يشدوا العربية ويطلعوها
_ دي لسة فيها النفس !!
اتفاجئوا إنها لسة بتأن !... لكنهم اتصدموا اكتر لما لقوها حامل !!
تكاتفوا وشدوا العربية وخرجوها لقوا فيها سيد بلدهم!!
_ حسين بييه يا وااد منك له !!!
اتصدموا لما لقوه غرقان في دمه ولحسن حظه إن رايه كانت مرفوعة عن الماية شوية لكن النفس كان بيطلع منه بسيط أوي يكاد يكون معدوم والست كريمة كمان مخبوطة وراسها بتجي دم كتير !!
خدوهم كلهم وطلعوا بيهم على المستشف ي فوراً
بيدخلوا المستشفى والممرضين بيسقتبلوهم بسرعة لأن الحالات خطر وبيحولوا سارة للمستوصف بتاع الدكتور إللي عنده رضا
بيشوف جلال الحركة ذادت فبيذداد قلقه الكبير على رضا وعلى إبنه وبيقف أدام الغرفة يعيط لما الممرضة بتطلع تاني تقول لانجي إللي ادتها فلوس عشان تقولها الأخبار أول بأول على إللي بيحصل جوا
_ ادعيلها يا ست هانم دا حالتها خطر أوي وصعب العيال تطلع سليمة ، ياهي يا العيال !!
جلال أول ما سمع كدة عيونه نزلت دموع وبيتراجع خطوات للخلف في صدمة وعدم تحمل فبتروحله انجي وبتحاول تهديه
_ اهدي يا حبيبي ، متعملش في نفسك كدة هتبقى كويسة
لكن جلال مهداش بالعكس افتكر عمايله السودا فيها إللي وصلتها للمرحلة دي
_ أنا السبب ، أنا السبب يا ماما ، هتموت بسببي!! ولادها إللي نفسها فيهم هيموتوا بسببي !!
قالها وهو عيونه حمرا وبيعيط بحرقة فخدته انجي في حضنها تطبطب عليه وتحاول تهديه
_ لأ مش أنت ، هي إللي جسمها ضعيف ومهتمتش بنفسها ! أنت مالكش دعوة يا حبيبي
غمض عيونه وهو بيحضن أمه بقوة وبيقول بين بكاه
_ يارب تبقى كويسة !
_ جلال بيه!!!!
جالهم صوت أحد الغفر وهو بيجري عليهم بعد ما لقاهم .. فصلت انجي العناق وبصتله باستغراب من وجوده ولكنه حاول ياخد نفسه وعلى وشه قلق وحيرة من الخبر إللي هيقوله ليهم دلوقتي!!
_ حسين بيه في المستشفى !
_ بابا !!
هتف جلال في رعب !
الغفير كان زعلان جدا وهو بيقول
_ الجماعة لقوه عامل حادثة ومضروب بالنار !
حطت انجي ايديها على بقها من الصدمة وجلال اتصنم مكانه ومن شدة ألمه مقدرش يصدر أي ردة فعل غير الصمت والبحلقه كأنه اتجمد !!!
جرت الممرضة من جنبهم وهي داخلة للدكتور تقوله
_ دكتور في حالة ولادة مستعجلة !!
خرج الدكتور من عند رضا إللي كانوا لسة بيحاولوا في الولادة بتاعتها وطلبوا دكتورة من برا البلد كمان تيجي ... وفي وسط كل دا دخلت ممرضة تنده الدكتور
وطلع الدكتور بالفعل
رغم خوف جلال على أبوه إلا إنه وقف الدكتور قبل ما يطلع وهو بيسأله بغضب
_ أنت رايح فين يا دكتور !!
بصله الدكتور فقال جلال بغضب أكبر
_ رايح فين وسايبها ؟
رد الدكتور بسرعة وهو عاوز يمشي
_ الممرضين معاها جوا هيساعدوها رضا حالتها متعسرة ادامها شوية لكن في حالة ضروري لازم تولد دلوقتي!!!
جلال زعق وصوته ملى المستشفى وهو بيمسك الدكتور من ياقته بعنف ومش مراعي سنه ولا مركزه
_ حالة مين دي أنت مش هتتحرك من مكانك أنت مجنون
_ سارة بتولد يا جلال!!!
قالها الدكتور لجلال فشهقت انجي وهي بتسأل
_ كانت مع حسين في العربية !!!
مردش الدكتور ومشي بسرعة لكن الغفير هز راسه وقال
_ أيوة يا ست هانم والست كريمة كمان .
نطق جلال من بين دموعه بصعوبة
_ بابا فين وديني ليه..
قال الغفير _ في العمليات بس في المستوصف التاني هو والست كريمة مش هنا إنما الست سارة جبناها هنا بتطلع في الروح
جلال غمض عيونه وحط ايده على راسه مش مصدق إللي بيحصلهم والمصايب إللي عمالة تنزل عليهم !! ..
وطلب من الغفير إنه يروح يشوف أبوه حالا
_ أنت هتروح فين وتسيبهم يا جلالل
_ أبويا بين الحياة والموت يا ماما حرام عليكي انتي مش بتحسيي
زعق فيها جلال وراح مع الغفير وانجي فضلت مكانها تشوف اللي هيحصل معاهم ....